استضافت الفنانة إسعاد يونس، الفنان سامح الصريطي وزوجته الفنانة حنان، وكشفا الأثنان عن تفاصيل زواجهما وكواليس الارتباط الأبدي بينهما.
وقالت حنان عن الصريطي: “سامح عنده مزرعة لطيفة أوي، ولما روحت عنده لقيته زارع كل حاجة إلا الحاجة اللي بحبها جدا وهي البقدونس.
“لقيته داخل عليا ومعاه حزمتين بقدونس وبيديهم لي هدية”.
تطور العلاقة
وقال «الصريطي» في لقائه مع الإعلامية إسعاد يونس في برنامج صاحبة السعادة على قناة dmc: «الحقيقة أنا حسيت في الفترة الأخيرة بإني بتشد ليها أكتر وأكتر.
“فالإحساس اللي جوايا هو جواها، بنتعامل كأصدقاء واخوات صحيح، لكن في شيء تاني بدأ يتسحب ويتسلل كدة، فقلت لها مش فاضل غير إننا نتجوز.
وأضاف: “أنا لاقيت الفرصة المناسبة لأني أقول الجملة دي، وهدية حزمة البقدونس جبتها عشان أقولها إني فاكر أنك بتحبي البقدونس.
“ومش كده وبس كنت حاطه ورا ضهري وقدمته زي روميو».
وأوضح:«ولما قلت هي ارتبكت، فقلت لها مترديش خالص دلوقتي، وقعدنا عادي جدًا بعدها، وبعدين سافرت ألمانيا وتعاملنا عادي.
“كأن مفيش حاجة ثم حسيت من خلال مفرداتها وكلامها أنها موافقة».
رد فعل الفنانة حنان
من جانبها قالت حنان: “أول ما قالي ما تيجي نتجوز، أنا اتخضيت لأني ما كنتش متوقعة خالص، بس مكنتش زعلانة بس مخضوضة من المفاجأة.
وأضافت: “كان جوايا قناعة بأن فيه حد في حياته ومخبي عليا، وكنت دايمًا بشوف البنات حواليه في كل مناسبة وخصوصًا الصغيرين.
“وكنت عاملة سيناريو مع نفسي، انه مش بيهتم بالمعجبين بيه، وبكده هو مخلص جدًا للي بيحبها، وكمان هو محترم جدًا، وده سهل عليا القرار.
“وبعدها سافرت ألمانيا تاني، ولما قالي خدي وقتك وفكري من غير ضغط، احترمت ده جدا وفعلا فكرت ومكنتش هلاقي أحسن منه، لأنه شخصية محترمة جدا.
